— Сынку, а сынку, уставай. Пара ўжо, сонца высока паднялося. Я ўжо і карову падаіла, загнала на пашу, ужо і малако зборшчыку дзеду Зміцеру аддала. Ужо і сняданак прыгатавала…. Матуля нізка схілілася над галавою хлопчыка. Не хацелася ёй трывожыць сынаў сон, падыйшла да ложка, прысела на ўслончыку. Рукі самі так і пацягнуліся пагушкаць, разбудзіць яго — і не магла. Аб чым думала жанчына? Што яе турбавала, трывожыла? Каб жыў бацька…, не бегала б цэлы ранак шукаць касцоў. Але хто ж дапаможа, калі ў кожнага сваё, кожны хоча хутчэй свой “лапік” скасіць у добрае надвор’е. ”Сынок мой, — падумала жанчына, — ты і ў школу пабег бы разам з іншымі дзеткамі, а так трэба адрываць”. Маці зірнула ў вочы сына, а ў іх столькі радасці, замілаванасці, пяшчоты! Сын павярнуўся на бок, сказаў нешта праз сон, і маці замітусілася, ці, можа, яна пачула, як дзядзька Яўхім пачаў касу кляпаць. — Та-а-ах, тук, та-а-ах, тук! — звонка ў свежым ранішнім паветры раздавалася ў двары дзядзькі Яўхіма. — Ой, Божачка, гэта ж і сыну трэба. Папрашу, ужо ж не адмовіць. Яна хуценька накіравалася да хлеўчука, дастала з-пад страхі касу. Вялікае, крыху пачарнеўшае бацькава кассё даўно не бралася ў мужчынскія рукі. Хоць і паржавелая, але яшчэ добрая каса. Збегала ў хату, знайшла ў падпечку малаток, збіла касу з касся, закруціла ў хустку і шпарка пайшла да суседа. — Любанькі мой Яўхімка, пакляпай ужо заадно касу і майму Рыгорку. — Спяшаюся я, машына чакае ўжо. Трэба бацвінне загрузіць на ферму, а потым ехаць на пакос. — Ну, хоць трохі.… Каб жа пацягнуць можна было, а то іржавай жа не пацягне.… Яўхімка, родненькі,… — яна запнулася, не ведаючы, як можна яшчэ ўпрошваць. Толькі падумала: “А няхай цябе ліха просіць”. І наважылася ісці. Дзядзьку стала ніякавата. Ён здаўся: — Давай, пабачу, што ў цябе за каса…. Яўхім — душэўны чалавек, але любіць, каб яго добра папрасілі. Дзядзька майстар, ого! Ён і шавец, і кравец. Яму больш за шэсцьдзесят, але яшчэ спрытны, да работы здатны. Да пенсіі кавалём працаваў, а цяпер на ферме бычкоў даглядае. У час жніва добраахвотна дапамагае рамонтнікам збожжаўборачных камбайнаў. А як выйдзе Яўхім у час сенакосу на луг — няма яму роўных! Любую работу робіць на “выдатна”. Адкляпае касу — не каса, а брытва. Дзядзька апошні раз прайшоў малатком па лязу. Пакратаў пазногцем, потым працягнуў Рыгоркавай маці: — Бяры, Надзея. Сама касіць будзе. — Каб жа сама, а то ж дзіця трэба выпраўляць. Вы ж ведаеце, Рыгорка ў мяне адзіны гаспадар. Вось і кручуся, як вавёрка ў коле: ні туды і ні сюды. Адным словам — баба. Што тут казаць. Конь распрогся зімой, ды і то ледзь не замерзла, плачучы каля яго. А тут жа трэба ўмець, абы як не будзеш па вярхах свістаць: людзі засмяюць. Скажуць: “Як жа ты пакасіла — атава ззаду расце”. А ці жаночая гэта справа? — От, пайду, разбужу сына, няхай ідзе косіць. Дні за тры саб’е, — цяжка ўздыхнула Надзея Рыгораўна. — Ён у цябе малайчына: і да навукі здатны, і да работы спец! Хоць і без бацькі расце. — Шкада яго, дзядзька Яўхім. І выпраўляць не хочацца, але як падумаю, што няма каму…... — Нічога, Надзея, памаленьку скосіць, — запэўніў дзядзька Яўхім. Надзея Рыгораўна прыбегла дамоў, пачала будзіць сына: “Рыгорка, уставай, я ўжо і касу знасіла пакляпаць, збірайся, а то паедуць. Хуценька снедай. І глядзі ж, нічога не забудзь, бабку з малатком ды брус захапі, бо я пайду на ферму”. ... Машына спынілася, не даязджаючы кіламетра паўтара да дамбы. Далей прыйдзецца ісці пешшу да Макаравай гары — так гаварылі колісь, так гавораць і сёння пра невялікі ўчастак, дзе пасля асушкі балот засталося адзінае дрэва — дуб і невялікі пагорак. Там, ля Макаравай гары, — сенакос. Мужчыны саскочылі з машыны, агледзеліся, ці не забылі чаго, павольна пайшлі шукаць свае ўчасткі. Хто заходзіў у пасадку выразаць дубцоў на тычкі, каб правільна правесці лінію, хто тут жа знаходзіў участак, кідаў у траву касу, гукаў суседа: — Ты, Іван, скамандуеш, дзе паставіць тычку, а я ў канец пабягу! Да Яўхіма падыйшоў Рыгорка: — Дзядуля, дапамажыце. — Зараз, унучак, зараз. Сядзь вунь на тым узгорку, адпачні. Мы з Іванам адтопчам, тады і за тваё прымемся. Туман паступова адступаў, рассейваўся. Промні сонца, яшчэ не вельмі гарачыя, купаліся ў серабрыстых лісцях бяроз і дубоў, мільярдамі іскрынак блішчэла на атаве раса. Праз кожныя пяць-шэсць крокаў былі відаць густыя сляды касцоў. Толькі на Рыгоркавай палосцы не было. Не адважваўся адзін правесці лінію, баяўся, каб не збочыць у чужое. Панура сядзіць і чакае, пакуль прыйдзе дзед Яўхім. ...Бацька трохі навучыў касіць. Гаварыў: “Вучыся, сынок, спатрэбіцца”. Сэрца ў яго было.… А ўсё працаваў, нягледзячы на хваробу. Вайна адняла здароўе яшчэ ў маладосці, калі партызаніў. Рыгорка глянуў на сонца. Неба было чыстае. Гулка звінелі косы. Пах прывялай травы разносіўся па ўсім лузе. Неўзабаве ля Рыгоркі апынуўся дзед Яўхім: — Бяры, Рыгорка, тычку, паставіш у канцы, а затым — на сярэдзіне. Узмах у цябе невялікі, але да вечара ўправішся. А яшчэ, акрамя гэтага, ёсць дзе? — Здаецца, Павел Кашэль, учотчык, казаў, што пад лесам яшчэ, за буракамі. — Нічога, касі, а вечарам, можа, я падыйду, дапамагу. Рыгорка накіраваўся да сярэдзіны дзялянкі, а дзед Яўхім папраўляў: — Ад сябе, ад сябе. Яшчэ, яшчэ. Шмат. Трошкі ўлева. От, от, добра. Стаў! Рыгорка — рухавы, кемлівы хлапчук — слухаўся ўзмаху дзедавай рукі. Ведаў: дзед махае ад сябе, значыць, тычку патрэбна падаць улева, калі да сябе — управа. Усё разумее Рыгорка. Калі, засопшыся, прыбег да дзеда, той сказаў: — Прывяжы на апошняй тычцы жменю травы, лепш будзе бачна. Цябе ж у школе вучаць. Як гэта…? Праз дзве кропкі правесці прамую... — А можа б, вы? — Не бойся, вядзі! Рыгорка захваляваўся, калі дзед даверыў яму. Але і сусед Іван падбадзёрыў: “Будзь мужчынай!” І хлапчук рашыўся. Стаў насупраць першай тычкі, патаптаўся на месцы, баючыся адыйсці ад яе, яшчэ раз зірнуў на канцавую, наверсе якой убачыў жмут травы, і ўзмахнуў касой. — Во, во! Малайчына! — пахваліў дзед Яўхім. Паволі Рыгорка дайшоў да канца. Вярнуўся назад. Скінуў пінжак. Затым падняў з травы касу, некалькі разоў прайшоў мянтушкай па лязу, выпрастаў плечы. — Касі лёгка, не націскай, а то да вечара не дакосіш. Рыгорка выконваў усе заўвагі, якія давалі суседзі. — Шась, шась! — звінела ў пажоўклай атаве хлапчуковая каса. Час ад часу наском касы ён трапляў у купіну. — А ты не спяшайся і не махай так, усё роўна хутчэй не будзе, а больш пяткай прыціскай, — павучаў дзед Яўхім. — Нешта стала дрэнна касіць, — паскардзіўся Рыгорка. — Ану, нясі сюды, мо ўжо насок загнуў, ці ў камень дзе стукнуў. — Ды не, у камень, здаецца, нідзе не стукаў. — Нясі, нясі, я гляну... Рыгорка падаўся да дзеда Яўхіма. — А што ж, кажу я, звярнуў насок і хоча, каб касіла. Дзед Яўхім спрытна пачаў наладжваць Рыгоркаву касу. У гэты час на лузе з’явілася маці. — Як мой касец? Умее? Ці прыстаў, сыночак? Адпачыў бы. Скосіцца як-небудзь... Ліха яе бяры, атаву, — звярталася то да сына, то да Яўхіма пастарэўшая за апошнія гады жанчына. Якое яна там шчасце бачыла, жывучы з Аляксеем! Для сябе мала і стараўся, усё для людзей. Пасля вайны доўгі час хварэў, акрыяўшы, у калгасе працаваў. Мала гадоў пражылі. Хоць бы яшчэ адзін сын быў, а то ж толькі Рыгорка. — Да вечара скосіш? А можа, папрасіць, каб мужчыны дапамаглі? — у голасе маці столькі цеплыні і пяшчоты. Ёй шкада сына. Паклаўшы руку на плячо Рыгоркі, прамовіла: — Дык я клікну мужыкоў? — Мы, цётка, і самі прыйдзем дапамагаць, вось толькі яшчэ па адным пракосу пройдземся. Рыгоркава маці праслязілася ад шчасця, сарамліва адвёўшы галаву ў бок. Неўзабаве мужчыны падыйшлі да хлапчуковай дзялянкі, сталі адзін за адным так, што Рыгорку месца не хапіла. — А мне дзе? — разгублена спытаў хлапчук. — Ты і так напрацаваўся, хопіць, — сказаў сусед Іван. Весела і дружна зазвінелі косы. Яно і зразумела. Добрыя і працавітыя суседзі ніколі не пакінуць у бядзе чалавека. Такі ў вёсцы звычай. ...Позна вечарам касцы вярталіся дамоў. Стомлены, але задаволены крочыў і Рыгорка.